Noss profis san co cha quai funcziuna.

Il maister da sauna scumparta la chalur cun agüd da stoffa, binderas e ventagls e tuot seguond bsögn tscherna il bognader la musica da culissa adattada. Il corp as schloccaja, la pel vain cultivada, las poras nettiadas. Oura il liber stan a disposiziun giaschaditschs chi permettan da profitar davo üna sauna da l'ajer da muntogna san e proveder il corp cun l'oxigen bsögnaivel, avant ch'el as sfradainta suot la duscha ed aint il batschigl da palombar. Davo racumonda il manader da la cuntrada da bogns e sauna, Andri König, ün bogn da peis chod per egualisar darcheu cumplettamaing la temperatura dal corp.

Cumpetent ed extraordinari

Eir ils duos show-bognaders dal Bogn Engiadina, Thomas Rohner e Ursina Semadeni san co chi funcziuna. Insembel han els ragiunt a la «Maestranza svizra da bognada» ad Ostermundigen illa concurrenza da bognada tant il seguond rang singul sco eir i'l team ed uschè as qualifichats da maniera suverana pels champiunadis mundials i'ls Pajais Bass. Chi chi fa la sauna aint il Bogn Engiadina nu gioda be ün evenimaint da sauna  extraordinari, mo as rechatta eir in mans cumpetents.

Star bain e giodair

Chi chi fa bain la sauna po trar a nüz plainamaing ils effets positivs per la sandà. Avant co ir illa sauna cunvaina per exaimpel da's süantar bain davo la duscha, qua cha pel sütta süa plü svelt. Da baiver dürant il sogiuorn illa sauna scussaglia Rohner, siond cha l'effet da la pürificaziun nu's muossa bod na. Davo la sauna esa però tant plü important da proveder darcheu il corp cul liquid pers. «I's stess desister d'activitats sportivas davo la sauna», declera Rohner, «per mantegner l'effet e per evitar reacziuns disfavuraivlas da la circulaziun.» Id es dimena racumandà da giodair la cuntrada muntagnarda sül prà per star a sulai o illa chasa da pos o da's prestar üna massascha.